FJARHITASKIPANIN

Fjarhitaskipanin er ein grønur orkuberi, sum kann taka ímóti hita frá øllum grønum orkukeldum. Tað er í roynd og veru bert hugflogið, sum setir markið fyri, hvussu nógvar grønar orkukeldur kunnu byggjast inn í fjarhitaskipanina. Tá tú velur árstølinini niðanfyri, sært tú útbyggingarætlanina hjá Fjarhitafelagnum fram til 2035.

Høvuðsleiðingin

Høvuðsleiðingin í fjarhitaskipanini strekkir seg av Sundi ígjøgnum høvuðsstaðin og heilt út á Argir, tó at øll høvuðsleiðingin ikki enn er bundin saman í eina samlaða hitaleiðing. Nøkur strekki eru eftir at knýta saman næstu árini, áðrenn fjarhitaskipanin er vorðin til ein samanhangandi, grønan orkubera. Fjarhitin kann við áhaldandi útbyggingum greinast víðari frá høvuðsleiðingini út til býarpartar og vinnuøki í høvuðsstaðnum, har undirtøka er fyri tí.

Elverkið á Sundi

Avlopshiti frá elverkinum hjá SEV á Sundi hitar vatnið í fjarhitaleiðingini, og avlopshitin fer sostatt ikki til spillis. Elverkið er ein høvuðskelda í hitaleiðingini. So hvørt alsamt meiri grøna orka verður bygd inn í elskipanina, og Sundsverkið verður niðurlagað til fyrst og fremst at vera tiltaksorka í elframleiðsluni, minkar avlopshitin frá Sundverkinum í fjarhitaskipanini. Samstundis byggir Fjarhitafelagið eisini út við grønum orkukeldum.

Brennistøðin á Hjalla

Ein stórur partur av hitanum í fjarhitaskipanini fæst frá avlopshitanum frá Brennistøðini á Hjalla. Hesin hitin hevði annars farið til spillis.

Biogassverkið á Skarðshjalla

Avlopshitin frá elframleiðsluni, sum biogassverkið á Skarðshjalla letur SEV, verður brúktur til hita í fjarhitaskipanini. Hesin hitin hevði annars farið til spillis.

Heitvatnstangi, elketil og hitapumpa

Heitvatnstangar – saman við t.d. elketlum og hitapumpum – eru við til at halda hitanum í fjarhitaleiðingini á nøktandi hitastigum, tá teinurin verður ov langur millum brúkaran og upprunakeldurnar – t.e. í løtuni Brennistøðin á Hjalla og Sundsverkið. Heitvatnstangar eru eisini tiltakshiti, um ov lítið av hita fæst burtur úr upprunakeldunum.

Vindmyllur

Avlopsorka frá vindmyllum kann nýtast í fjarhitaskipanini. Elorka frá vindmyllum, sum ikki verður brúkt í elskipanini, kann brúkast at hita elspiralar í heittvatnstangum í fjarhitaskipanini. Elorka frá vindmyllum, ið er til avlops, kann eisini brúkast til at reka hitapumpur, sum hita vatnið í tangunum.

Sjóhitapumpur

Avlopsorka frá vindmyllum, sum ikki verður brúkt í elskipanini, kann brúkast at reka sjóhitapumpur, og soleiðis fær fjarhitaskipanini eisini hita úr sjónum.

Oljuketil

Um eingin onnur orka er tøk, verða oljuketlar brúktir sum tiltaks- og fyribilsorka. Oljuketlar verða enn brúktir á teimum teinum, har arbeiðið at útbreiða fjarhitan ikki er komið so langt, at samband er við upprunakeldurnar – t.e. í løtuni Brennistøðin á Hjalla og Sundsverkið.